Вход

Изображения в галерее

28_11_08_-_007_021.jpg
836_00.jpg
826_70.jpg

АКАФИСТ Пресвятой Богородице в честь иконы Ея Иверская


Иверская икона Божией Матери

Кондак 1
      Взбранной Воеводе, Владычице нашей Богородице, похвальная пения приносим Ти раби Твои, яко пришествием честнаго образа Твоего стяжавший щит крепкий, стену необоримую и стража неусыпна. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякаго вреда, душевнаго и телеснаго, да зовем Ти:
     Радуйся, благая Вратарнице, двери райския верным отверзающая.

Икос 1
      Ангел предстатель послан бысть рещи Богородице, егда паде Ей жребий апостольскаго служения в земли Иверстей: «Не разлучайся Иерусалима, жребий же, Тебе падший, просветится в последния дни, Ты же имаши потрудитися в земли, юже Тебе Бог изволит»; темже зовем Ти:
     Радуйся, Еюже Евангелие благовестится;
     Pадуйся, Еюже идольская прелесть упразднится.
     Радуйся, Еюже власть князя тьмы разрушится;
     Pадуйся, Еюже Царство Христово утвердится.
     Радуйся, падших во тьму идолослужения к свету Евангелия воззвание;
     Pадуйся, от рабства диаволу в свободу славы чад Божиих приведение.
     Радуйся, готовая служительнице Сына Своего и Бога;
     Pадуйся, послушанием преслушание Евы исцеляющая.
     Радуйся, высото добродетелей;
     Pадуйся, глубино смиренномудрия.
     Радуйся, Еюже невернии познают Творца;
     Pадуйся, Еюже вернии усыновляются Отцу.
     Радуйся, благая Вратарнице, двери райския верным отверзающая.

Кондак 2
      Видящи Святая Дева дивное и новое о Себе промышление Божие, яко раба Господня, присно готовая творити волю Его, возопи: Аллилуия.

Икос 2
      Разум недоразумеваемый глагола ангельскаго разумен Тебе, Пречистая, творя Господь, управи шествие Твое к горе Афонстей, идеже проповедася Тобою Евангелие, и тако явися жребий Твой. Мы же радостно вопием:
     Радуйся, освятившая Афон Своим пришествием;
     Pадуйся, низложившая тамо идолов.
     Радуйся, насадившая тамо веру истинную;
     Pадуйся, неверие отгнавшая.
     Радуйся, в жребий Себе гору сию избравшая;
     Pадуйся, благодать сему месту обещавшая.
     Радуйся, верным, живущим в ней, подательнице земных благ;
     Pадуйся, Споручнице вечнаго их спасения.
     Радуйся, теплая Ходатаице о живущих в жребии Твоем;
     Pадуйся, всех врагов их устрашение.
     Радуйся, милость Сына Своего до скончания века месту сему обещавшая;
     Pадуйся, благодать Его неотступною быти предрекшая.
     Радуйся, благая Вратарнице, двери райския верным отверзающая.

Кондак 3
      Сила Вышняго заступлением Богоматере осени Святую гору и удолия и дебри ея яко село пространное показа всем в иночестей жизни хотящим жати спасение, внегда пети сице: Аллилуия.

Икос 3
      Имущи промышление о жребии Своем, людех Иверския земли, устроила еси в месте, идеже Сама к Афону пристала еси, обитель роду их, в тихое пристанище ищущим спасения, Хотящи даровати ей в щит и ограждение икону Свою, да вси взывают:
     Радуйся, пославшая проповедницу Евангелия в землю Иверскую;
     Pадуйся, обратившая сию страну от прелести идольстей к свету Христову.
     Радуйся, отрасли неувядаемыя розго, дивную лозу Нине даровавшая;
     Pадуйся, от нея произрастившая гроздие чудес и благая веры.
     Радуйся, сад духовный на Афоне насадившая;
     Pадуйся, струю из него просвещения духовнаго стране Иверстей источившая.
     Радуйся, Евфимия златословесная уста;
     Pадуйся, Торникия непобедимая крепосте.
     Радуйся, всех благочестивых укрепление;
     Pадуйся, иноков ограждение.
     Радуйся, тихое пристанище ищущих спасения;
     Pадуйся, вечный покой им уготовляющая.
     Радуйся, благая Вратарнице, двери райския верным отверзающая.

Кондак 4
      Бурю внутрь имущи помышлений сумнительных, честная вдовица, яже в Никеи, смятеся, зрящи копием воина иконоборца прободену святую и чтимую икону Богоматере и абие источившу кровь и, страхом обдержима, да не поругана будет святая икона, с молитвою слезоточащи вверже ю в море. Увидевши же ю прямо верху воды путь творящу и текущу к Западу, возопи с веселием: Аллилуия.

Икос 4
      Видеша иноцы Святыя горы явльшийся в мори яко пламень, яко столп огнен, егоже верх досязаше небеси, яко солнце сияющее, и в нощи притекоша к краю моря и, видевше святую икону Богоматере, по морю носимую силою свыше, возопиша Благодатней:
     Радуйся, купино, Законоположником предзримая;
     Pадуйся, столпе огненный, наставляяй сущия во тьме.
     Радуйся, лествице, досязающая до Небес, еюже сниде Бог;
     Pадуйся, мосте, преводяй сущих от земли на Небо.
     Радуйся, заре таинственнаго дне;
     Pадуйся, звездо, являющая Солнце.
     Радуйся, Свет Неизреченный родившая;
     Pадуйся, еже како ни единаго же научившая.
     Радуйся, облеченная в солнце, сияющая благодатию и славою всей вселенней;
     Pадуйся, молние, души просвещающая и верных смыслы озаряющая.
     Радуйся, светлосте, во тьме светящая;
     Pадуйся, яко многосветлое возсияваеши просвещение.
     Радуйся, благая Вратарнице, двери райския верным отверзающая.

Кондак 5
      Боготечную икону Свою дати хотящи Иверстей обители, рекла еси, Богомати, преподобному Гавриилу: «Иди с ликом иноков к брегу моря, сниди в пучину и приими икону Мою». Он же, верою и любовию окриляемь, по воде, аки по суху ходя, прият ю во объятия своя и, достиг сокровища, иным недостижимаго, в достояние иноков рода своего иверскаго, веселяся пояше: Аллилуия.

Икос 5
      Видеша иноцы Иверстии многажды икону Богоматере из храма в верху врат монастырских на стену града незримою силою изнесенную, ужасахуся и стояху, зовуще к ней таковая:
     Радуйся, святую икону дати нам изволившая;
     Pадуйся, покров ю быти нам обещавшая.
     Радуйся, любовь Твою к обители нашей показавшая;
     Pадуйся, благое о ней промышление явившая.
     Радуйся, помощь наша в чуждей стране;
     Pадуйся, в странствии нашем утешение.
     Радуйся, Божие к нам благоволение;
     Pадуйся, наше к Богу дерзновение.
     Радуйся, слез наших избавление;
     Pадуйся, сирых нас защитнице.
     Радуйся, ограждение наше;
     Pадуйся, едина радосте наша.
     Радуйся, благая Вратарнице, двери райския верным отверзающая.

Кондак 6
      Проповедника творящи Гавриила воли Своея, рекла еси к нему, Владычице: «Не приидох хранима быти от вас, но да буду Аз хранительница ваша не токмо в настоящем, но и в будущем веце. Се даю вам знамение: дондеже зрите в монастыре икону Мою, не оскудеет вам благодать Сына Моего и милость, да вопиют Ему вси: Аллилуия».

Икос б
      Возсия радость велия слышавшим Твоя, Богомати, обетования, и Тебе, небесней Вратарнице, храм на вратех обители с веселием иноцы воздвигоша и возопиша тако:
     Радуйся, хранительнице наша в настоящем веце;
     Pадуйся, предстательнице наша в будущем.
     Радуйся, страху Божию нас научающая;
     Pадуйся, на путь добродетели наставляющая.
     Радуйся, дерзновение наше и надеждо;
     Pадуйся, упование наше и покров.
     Радуйся, благоутробне Сына Своего к нам преклонившая;
     Pадуйся, благодать Его неоскудно пребывати с нами возвещающая.
     Радуйся святую икону залогом милости давшая;
     Pадуйся, дар чудодействия ей даровавшая.
     Радуйся, прилог всякаго зла от обители отражающая;
     Pадуйся, всему благому вход отверзающая.
     Радуйся, благая Вратарнице, двери райския верным отверзающая.

Кондак 7
      Хотящу иногда злочестивому Амире обитель Иверскую разорити и стадо иноков, тамо собранное, разсеяти, скоро позна крепкое обители заступление от Богоматере, увидев корабли своя в пучине моря погрязшия и ратники изгибшия. И пришед со смирением; сребро и злато в обитель даяше, молитвы прося. Иноцы же, видевше сия, возопиша к Богу: Аллилуия.

Икос 7
      Новыя и безчисленныя чудеса показа Богоматерь, в обители оскудение вина, муки и елея восполняющи, бесныя исцеляющи, хромым хождение дарующи, слепым прозрение и всяк недуг врачующи, да, видяще чудеса сия, воспевают Тебе:
     Радуйся, Взбранная Воеводо, враги побеждающая;
     Pадуйся, скорая на помощь призывающим Тя.
     Радуйся, не презирающая моления нашего;
     Pадуйся, обещания Своего не отступающая.
     Радуйся, скорбь обители в радость претворяющая;
     Pадуйся, оскудение обители восполняющая.
     Радуйся, слепых прозрение;
     Pадуйся, хромых хождение.
     Радуйся, всех немощных целительнице;
     Pадуйся, всех скорбных утешительнице.
     Радуйся, яко не престаеши промышляющи и спасающи нас;
     Pадуйся, яко от толиких бед избавляеши нас.
     Радуйся, благая Вратарнице, двери райския верным отверзающая.

Кондак 8
      Странно покрываемую от иконы Богоматере обитель Иверскую слышав Патриарх Никон, вожделе и Российстей стране благодати Ея стяжати причастие; сего ради, создав обитель в честь славнаго образа, со тщанием испроси изображение чудотворнаго образа Богоматере, да, покровом Ея защищаеми, вопиют Богу: Аллилуия.

Икос 8
      Вся сущи в Вышних, но и нижних не отступающи, благоизволила еси, Богомати, якоже древле преподобному Антонию даровася благословение горы Афонския на утверждение обители Печерския, даровати и новой обители в стране Российстей благодать Свою, еюже благословила еси Афон, в подобии честнаго образа Твоего; темже взываем Ти:
     Радуйся, страны Российския покрове, ширший облака;
     Pадуйся, православныя веры в ней ограждение и утверждение.
     Радуйся, Православныя Церкве непоколебимый столпе;
     Pадуйся, ересей и расколов обличение.
     Радуйся, светлыми лучами чудотворных икон всю страну озаряющая;
     Pадуйся, дары исцелений и милостей от них источающая.
     Радуйся, державы нашей утверждение;
     Pадуйся, врагов устрашение.
     Радуйся, святителей веселие;
     Pадуйся, иереев похвало.
     Радуйся, иноков наставнице;
     Pадуйся, всего рода нашего спасение.
     Радуйся, благая Вратарнице, двери райския верным отверзающая.

Кондак 9
      Всяко тщание имуще о написании честнаго образа милостивыя Вратарницы, сонм постников иверских молебная пения совершает, водою от чудныя иконы омывает дску, на нейже имать изобразится честный образ, и преподобнаго Иамвлиха освящает, иже подвизався в посте, молитве и бдении со всею братиею, списа вапы, святою водою и мощами освященными, честное изображение Богоматере, выну моляся и вопия Богу: Аллилуия.

Икос 9
      Ветия многовещанныя, яко рыбы безгласныя, видим о Тебе, Богородице: недоумеют бо, како по достоинству похвалити вся чудеса Твоя, явленная роду нашему от святыя Твоея иконы: еще бо на пути в Российскую страну сия чудодействоваше, благочестивому Мануилу повелевая выкуп дата неверным, возбраняющим шествие святыя иконы в страну Русскую, и сугубо ему послежде отдавши. Мы же, дивящеся, верно вопием Ти:
     Радуйся, источниче чудес неисчерпаемый;
     Pадуйся, всякия милости подательнице.
     Радуйся, всегда теплая о нас Ходатаице к Богу;
     Pадуйся, промышления Его о нас сокровище.
     Радуйся, сущим в бедах прибежище;
     Pадуйся, скорбящих утешение.
     Радуйся, больных исцеление;
     Pадуйся, немощных укрепление.
     Радуйся, вдов заступление;
     Pадуйся, сиротствующих милосердая Мати.
     Радуйся, заблуждающих на путь истины обращение;
     Pадуйся, грешников к покаянию воззвание.
     Радуйся, благая Вратарнице, двери райския верным отверзающая.

Кондак 10
      Спасти хотящи многая люди от бед и скорбей, источаеши, Богомати, неоскудный источник милости от Своея иконы роду нашему: се бо и в стольном граде Москве благая Вратарница являешися всем покланяющимся Тебе, скорое вспоможение подавающи, и в новой обители Иверстей благодати струи от иконы Твоея испущаеши, и во иных градех, обителех и весех чтущим Тя полезное прошение исполняющи. Темже, прославляя Бога, давшаго нам благодать таковую, вопием Ему; Аллилуия.

Икос 10
      Стена еси иноческому чину, Богородице, и всем, к Тебе прибегающим; ибо Небесе и земли Творец, вселься в девственной утробе Твоей, научи всех чистоты и целомудрия ревнителей возглашати Тебе:
     Радуйся, девства сосуде избранный;
     Pадуйся, чистейший образе целомудрия.
     Радуйся, чертоже безсеменнаго уневещения;
     Pадуйся, Невесто Неневестная.
     Радуйся, Сеятеля чистоты рождшая;
     Pадуйся, верных Господеви сочетавшая.
     Радуйся, в бури искушений скорая помощнице;
     Pадуйся, прилога врага отражающая.
     Радуйся, мглу душевредных страстей отгоняющая;
     Pадуйся, помыслы очищающая.
     Радуйся, земныя сласти презирати научающая;
     Pадуйся, к горнему умы и сердца направляющая.
     Радуйся, благая Вратарнице, двери райския верным отверзающая.

Кондак 11
      Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти, Владычице наша Богородице, ничтоже совершаем достойно, яже подаваеши нам, о Тебе вопиющим: Аллилуия.

Икос 11
      Светоприемную свещу, сущим во тьме бед явльшуюся, зрим святую икону Богоматере: невещественный бо огнь благодати приемлющи, лучами чудес всех озаряет, научающи сице взывати Благословенней:
     Радуйся, во всяких нуждах скорое вспоможение;
     Pадуйся, в печалех быстрое услышание.
     Радуйся, от огня, меча и нашествия иноплеменных нас избавляющая;
     Pадуйся, от глада и напрасныя смерти нас свобождающая.
     Радуйся, от язвы и всегубительства смертнаго нас соблюдающая;
     Pадуйся, бедствующим в пути, на суше и на водах внезапное вспоможение.
     Радуйся, язв душевных и телесных врачевание;
     Pадуйся, оставленных врачами в Свои руки приемлющая.
     Радуйся, милосердая утешительнице всех скорбящих и обремененных;
     Pадуйся, не отвергающая всех презренных и отверженных.
     Радуйся, самых отчаянных из рова погибели исхищающая;
     Pадуйся, и мене, обнаженнаго добрых дел, не оставляющая Своим покровом и заступлением.
     Радуйся, благая Вратарнице, двери райския верным отверзающая.

Кондак 12
      Благодать дати восхотев долгов древних, всех долгов Решитель человеком, прииде Собою ко отшедшим Того благодати и, раздрав рукописание, дарова нам крепкое Богоблагодатныя ходатайство, да вопием вси молитвами Ея: Аллилуия.

Икос 12
      Поюще Твоя чудеса, являемая нам в жизни сей, хвалим Тя, Богородице, яко милости источник неисчерпаемый. Но, припадающе к Тебе пред чудотворною иконою Твоею, молим Тя смиренно, буди нам покров и защищение и в день кончины нашея, и егда имамы предстати на суд страшному Престолу Сына Твоего, да вопием Ти:
     Радуйся, во славе приседящая Престолу Сына Твоего и тамо нас воспоминающая;
     Pадуйся, с Сыном Твоим и Богом вечно царствующая и о нас ходатайствующая.
     Радуйся, уповающим на Тя конец живота непостыден дарующая;
     Pадуйся, безболезненную и мирную кончину устрояющая.
     Радуйся, мытарств горьких избавление;
     Pадуйся, от власти князя воздушнаго свобождение.
     Радуйся, грехов наших непоминовение;
     Pадуйся, по Господе упование нам блаженныя жизни.
     Радуйся, уповающим на Тя одесную Сына Твоего стояние устрояющая;
     Pадуйся, блаженнаго гласа Онаго, Небеснаго Царствия наследие обещающаго, слышати сподобляющая.
     Радуйся, благая Мати, всех чтущих Тя жити с Собою вселяющая;
     Pадуйся, крепкая надеждо вечнаго спасения всем христианом.
     Радуйся, благая Вратарнице, двери райския верным отверзающая.

Кондак 13
      О Всепетая Мати, Пресвятая Госпоже Дево Богородице! Призри на нас, приносящих смиренно со слезами малыя сия молитвы пред пречистым Твоим образом и все упование и надежду возложивших на Тя, и избави нас всех бед и напастей в животе сем и будущия изми муки, да спасаемии Тобою, вопием выну: Аллилуйя.
Этот кондак читается трижды, затем 1-й икос «Ангел предстатель...» и 1-й кондак «Взбранной Воеводе...»

МОЛИТВА КО ПРЕСВЯТЕЙ БОГОРОДИЦЕ
      О Пресвятая Дево, Мати Господа, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему. Се бо, грехми погружаемии и скорбьми обуреваемии, взирающе на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам, немощным, утоли скорбь нашу, настави на путь правый нас, заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину и на Страшнем суде Сына Твоего явися нам милосердая заступница, да всегда поем, величаем и славим Тя, яко благую заступницу рода христианскаго, со всеми угодившими Богу. Аминь.

Тропарь Пресвятой Богородице перед Ея иконой, именуемой «Иверская»
Тропарь, глас 4:
      От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.

Ин тропарь, глас 1:
      Дерзость ненавидящих образ Господень, и держава нечестивых безбожно в Никею прииде, и посланнии безчеловечно вдовицу, благочестно чтущую икону Богоматере, истязуют. Но тая нощию с сыном икону в море пусти, вопиющи: слава Тебе, Чистая, яко непроходимое море плещи Своя подаде, слава правошествию Твоему, Едина Нетленная.

Кондак, глас 8:
      Аще и в море ввержена бысть святая икона Твоя, Богородице, от вдовицы не могущия спасти сию от врагов, но явилася есть хранительница Афона и вратарница обители Иверския, враги устрашающая и в православной Российстей стране чтущия Тя от всех бед и напастей избавляющая.

Ин кондак, глас 4:
      Совозсия днесь Свету Воскресения свет чистыя иконы Твоея, обоя весело торжествующе вопием: сохрани раб Твоих благодатию, Владычице.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точищи исцеления всем с верою притекающим.

Православный календарь

Май 2017
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

События календаря

Нет событий

Обсуждение на форуме

Тема: Jeunesse ???°?? ?·?°???°...
Написал: SoniahEt   24.05.2017

Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.