Вход

Изображения в галерее

818_53.jpg
835_83.jpg
P1071294.JPG

АКАФИСТ ПРЕСВЯТОЙ БОГОРОДИЦЕ В ЧЕСТЬ ИКОНЫ ЕЯ КАЗАНСКОЙ


Казанская икона Божией Матери.

Кондак 1
      Избранней от всех родов Заступнице рода христианского, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти:
     Радуйся, Заступнице усердная рода христианскаго.

Икос 1
      Ангел предстатель послан бысть рещи Богородице: «Радуйся!», егда Бог Слово воплощашеся во утробе Ея: и мы, грешнии, прославляюще явление чудныя Ея иконы и Божественного Младенца Спаса Христа, со умилением вопием Благодатней:
     Радуйся, Богоизбранная Отроковице;
     Pадуйся, Мати Божия.
     Радуйся, Царице Небесе и земли;
     Pадуйся, светлое Церкви Небесныя и земныя украшение.
     Радуйся, Ангелы чтимая;
     Pадуйся, певаемая от Серафим.
     Радуйся, светлое пророческое сбытие;
     Pадуйся, апостолов похвало.
     Радуйся, мученическое исповедание;
     Pадуйся, преподобных венче.
     Радуйся, праведных веселие;
     Pадуйся, грешных упование.
     Радуйся, Заступнице усердная рода христианскаго.

Кондак 2
      Видящи, Всенепорочная, с высоты Небеснаго жилища Своего, идеже с Сыном Твоим в славе пребываеши, скорбь рабов Твоих в новопросвещенном граде, яко гневнаго ради Божия посещения вера Христова поругаема бывает агарянским зловерием, благоволила еси явити икону Свою, чудесы ю прославляющи, да утверждаемии знаменьми Твоея благодати, христолюбивии людие верно вопиют Богу: Аллилуиа.

Икос 2
      Разумение трикратного явления Богоматере мудрая отроковице ищущи, тече ко властем, поведающи им дивное явление и грозное прещение: мы же, дивящеся свыше данному отроковице вразумлению, благоговейно вопием к Преблагословенней:
     Радуйся, устнами детей хвалу Богови совершающая;
     Pадуйся, тайны благодати Божия юным открывающая.
     Радуйся, неверных сумнительное слышание;
     Pадуйся, верных известная похвало.
     Радуйся, моление, неверных устрашающая;
     Pадуйся, славою чудес Твоих верных смыслы озаряющая.
     Радуйся, агарянскаго зловерия обличение;
     Pадуйся, гордыни их низложение.
     Радуйся, веры христианския утверждение;
     Pадуйся, почитания святых икон освящение.
     Радуйся, скорбь нашу в радость претворяющая;
     Pадуйся, несумненною надеждою нас увеселяющая.
     Радуйся, Заступнице усердная рода христианскаго.

Кондак 3
      Сила Вышняго благодатию Богоматере умудри и укрепи отроковицу к исканию многоценнаго Божия дара, и та, с верою дерзающи о Господе, приступи к труду и, скрытое в земли обретши сокровище святыя иконы Богоматери, радостно возопи к Богу: Аллилуиа.

Икос 3
      Имеющи благоутробное промышление о новопросвещенных людех града Казани, от пречестныя Твоея иконы токи чудес источила еси, Владычице, слепым телесныма очима зрение подавающи, омраченных же душевно светом богопознания и благочестия озаряющи, действующим под осенением Твоея иконы пристанище небурное дарующи. Сего ради зовем Ти:
     Радуйся, явлением иконы Твоея тьму лютых обстояний отгоняющая;
     Радуйся, лучами чудес всех просвещающая.
     Радуйся, слепых прозрение;
     Pадуйся, омраченных смыслом просвещение.
     Радуйся, славо Православия;
     Pадуйся, тихое пристанище ищущих спасения.
     Радуйся, Мати целомудрия;
     Pадуйся, покрове и ограждение девства.
     Радуйся, Еюже ликовствует все множество верных;
     Pадуйся, Еяже ради рыдает демонское полчище.
     Радуйся, всех христиан вожделенная Помощнице;
     Радуйся, всех скорбящих Радосте.
     Радуйся, Заступнице усердная рода христианскаго.

Кондак 4
      Бурю смятений и крамолы врагами воздвигнутую в стране нашей утолити тщащься блаженный Ергомен, списатель чудес Твоея, Богомати, иконы, слезно пред нею молящиеся и, видев, яко воинству православному в щит и победное знамение Твоя икона даровася, верою укрепляемый до конца живота своего, вопиюще Богу: Аллилуиа.

Икос 4
      Слышавше православнии воини откровенную Преподобным Сергием святителю Арсению тайну, яко предстательством Богоматере суд об Отечестве нашем преложен на милость, икону Богоматерню, яко знамя победное, приимше, исхитриша матерь градов русских из рук супостат и возопиша Заступнице христиан:
     Радуйся, Мати Бога Вышняго;
     Pадуйся, яко за всех молиши Сына Твоего, Христа Бога нашего.
     Радуйся, яко всем твориши спастися, в державный Твой покров прибегающим;
     Pадуйся, Заступнице всех сущих в скорбех и болезнех.
     Радуйся, всем молящимся сокрушенным сердцем пред пречистым Твоим образом полезная дарующая;
     Pадуйся, избавление зол всем, невозвратно надежду имущих на Тя.
     Радуйся, тихое и доброе пристанище;
     Pадуйся, скорая Помощнице.
     Радуйся, готовый и теплый покрове спасения;
     Pадуйся, источающая нам неоскудныя милости.
     Радуйся, предваряющая нам помощь;
     Pадуйся, избавляющая от всех бед.
     Радуйся, Заступнице усердная рода христианскаго.

Кондак 5
      Боготечная звезда явися Твоя, Богоматери, икона, всю страну Российскую обтекающая, лучами чудес Твоих осиявающая всех блуждающих по морю страстнаго жития, мрак печалей и мглу всяких недуг и скорбей прогоняющая и наставляющая на путь спасения с верою к Тебе притекающих и вопиющих к Богу: Аллилуиа.

Икос 5
      Видев царь Петр, яко от святыя иконы Богоматерни благодатию Божией содеваются многия чудеса, приемлет ю в путеводительницу воинству своему и в день брани на свеев в щит и покров, и победив до конца врага помощию Богоматере, тем камень совершенный во основание новаго царствующего града положи, икону же Твою чудную, яко освящение, яко щит и ограждение, в сердце града постави. Сего ради вопием Пречистей:
     Радуйся, жилище и доме Христа Бога нашего;
     Pадуйся, вместилище неизреченныя Его славы.
     Радуйся, граде одушевленный, присно царствующий;
     Pадуйся, палато преукрашенная.
     Радуйся, Радосте градов и весей;
     Pадуйся, непобедимое христиан в бедах хранилище и предградие.
     Радуйся, Церкве православное похвало;
     Pадуйся, Русской земли утверждение.
     Радуйся, христолюбиваго воинства Помощнице;
     Pадуйся, врагов одоление.
     Радуйся, от бед избавление;
     Pадуйся, Матерними Твоими щедротами всех посещающая.
     Радуйся, Заступнице усердная рода христианскаго.

Кондак 6
      Предстоящим пред пречистым Твоим образом архиереев сословие и вси людие, монаси и мирстии, проповедуют, Госпоже Богородительнице, великая Твоя милости, яко грады ограждаеши, обители покрываеши, веси защищаеши, и, ведуще Тя воистинну Помощницу сильну и непобедиму, со слезами приносят Ти молитвы, да простреши к Сыну Твоему Богоносныя руки за люди Твоя, во еже избавити нас от всех бед и напастей, да благодарне вопием Богу: Аллилуиа.

Икос 6
      Возсиявши просвещение истинное и отгнавши древле лесть агарянскую во новопросвещенней стране Казанской, ныне во всех градех российских светиши светом чудес и милостей: притекающий бо с верою ко Твоей иконе цельбоносней скорбей избавление, недугов исцеление и радости всякия исполнения приемлют, вопиюще Тебе усердно:
     Радуйся, неистощимый источниче святыни;
     Pадуйся, многотекущая реко Божественная благодати.
     Радуйся, грешных с Богом примирение;
     Pадуйся, грехов наших очищение.
     Радуйся, благочестия Наставнице;
     Pадуйся, в добрых делех утверждение и помоще.
     Радуйся, добрыя обеты приемлющая;
     Pадуйся, благим намерением способствующая.
     Радуйся, злыя начинания разрушающая;
     Pадуйся, вражия козни расторгающая.
     Радуйся, скорая человеком Помощнице;
     Pадуйся, милость сугубо нам подающая.
     Радуйся, Заступнице усердная рода христианскаго.

Кондак 7
      Хотящу народу православному исповедати милости Преблагословенныя Царицы Неба и земли и по силе благодарственная принести о избавлении его от нашествия иноплеменных, дивному храму, созданному в честь пречудныя иконы, победная в дар принесе, да вси памятующе милость Богоматере, спасшия град сей и страну, выну воспевают Богу благодарными усты: Аллилуиа.

Икос 7
      Стольному граду России святая икона Твоя, Богомати, воистинну явися благая Одигитрия, якоже древле Цареграду: к Тебе бо прибегают людие, помощи Твоея на начало пути и дел просяще и благодарственная приносяще моления пред пречистою иконою Твоею за избавление от скорбей и напастей, Тебе Помощницу и Заступницу крепкую ведают. Темже благодарственно вопием Ти:
     Радуйся, Российския страны покрове;
     Pадуйся, ограждение и утверждение.
     Радуйся, несокрушимый щите воинов наших;
     Радуйся, броне их неуязвимая.
     Радуйся, козни врагов обличающая;
     Pадуйся, яко паучину их растерзающая.
     Радуйся, нечестия обличение;
     Pадуйся, крамолы разрушение.
     Радуйся, юных от заблуждений исправление;
     Pадуйся, старцев утешение.
     Радуйся, душевредных учений низложение;
     Pадуйся, душеполезных знаний дарование.
     Радуйся, Заступнице усердная рода христианскаго.

Кондак 8
      Странно и сумнительно неверующим слышати, как от иконы Твоея токи благодати истекают, воня животная благоухает: мы же, верующе слову, реченному Тобою, Владычице, к первонаписанней иконе: «С тобою Моя благодать и сила», уповаем, яко и с сею иконою благодать Твоя выну: темже благоговейно предстояще любызаем ю, покланяемся ей, яко Тебе Самей сущей, честь бо иконы на первообразное восходит, и Твоя благодать сею иконою знамения и чудеса содевает всем с верою притекающим к Тебе и вопиющим Богу: Аллилуиа.

Икос 8
      Вся бывши горе, к Небесным взята, и земных не оставлявши, Богомати, священным Твоим предстательством: имаши бо Матернее дерзновение ко Христу Богу нашему. Темже утверди в мире глубоце православных житие и вся полезная всегда даруй рабом Твоим, да величающе воспеваем Ти:
     Радуйся, Невместимаго вместилище;
     Pадуйся, осененная силою Вышняго.
     Радуйся, прозябшая Клас Небесный;
     Pадуйся, мир весь душепагубнаго глада избавльшая.
     Радуйся, выну ходатайствующая за род наш;
     Pадуйся, яко много может молитва Твоя пред Сыном Твоим и Богом.
     Радуйся, всех нас при Кресте Сына Твоего усыновившая;
     Pадуйся, всегда Матернюю любовь к нам являющая.
     Радуйся, Ходатаице вечных благ;
     Pадуйся, и во временней жизни полезная нам подающая.
     Радуйся, известное прибежище наше во всех скорбных обстояниих;
     Pадуйся, несомненное утешение в печалех.
     Радуйся, Заступнице усердная рода христианскаго.

Кондак 9
      Всякаго естества ангельскаго превышшая явилася еси, Пресвятая Дево: Бога бо зачала еси плотию, Невместимаго всеми вместила еси во утробе Твоей, на руках носила еси Носящего весь мир дланию: темже, яко честнейшую Херувим и славнейшую без сравнения Серафим величающе Тя, вопием о Тебе Богу: Аллилуиа.

Икос 9
      Ветия многовещанныя, яко рыбы безгласныя, видим о Тебе, Богородице: недоумеет бо всяк язык благохвалити Тя по достоянию, изумевает ум пети Тя, Богородице; обаче Благая сущи, приими и от нас архангельский глас, Тебе вопиющих:
     Радуйся, Благодатная;
     Pадуйся, яко Господь с Тобою.
     Pадуйся, Благословленная в женах;
     Pадуйся, обретшая благодать у Бога.
     Радуйся, родившая Спасителя миру;
     Pадуйся, Мати Сына Божия.
     Радуйся, Родительнице Вечнаго Царя;
     Pадуйся, израстившая нам плод живота.
     Радуйся, освященная Духом святым;
     Pадуйся, осененная силою Всевышняго.
     Радуйся, верная рабо Господня;
     Pадуйся, яко Тя блажат вси роди.
     Радуйся, Заступнице усердная рода христианскаго.

Кондак 10
      Спасти хотящи многия от находящих зол, скорбей и болезней, чудную икону Твою, Богомати, даровала еси, еяже ради слепии прозирают, хромии ходят, разслабленнии возстают, беснующиеся исцеляются, земли плодоносие подается, людие от смертоносныя язвы избавляются, грады и домы от огня спасаются: темже прославляюще Бога, дающаго нам таковыя милости, вопием Ему усердно: Аллилуиа.

Икос 10
      Стена еси, Богородице, стране Российстей, градом ограждение и слава, православному воинству на враги укрепление. Темже, благодаряще Тя, вопием:
     Радуйся, прославляющих Тя прославляющая;
     Pадуйся, нечтущих Тя посрамляющая.
     Радуйся, врагов устрашение;
     Pадуйся, от нашествия иноплеменных избавление.
     Радуйся, воинов крепосте;
     Pадуйся, в дни брани забрало и ограждение.
     Радуйся, в дни мира живоносный саде, увеселяющий сердца верных;
     Pадуйся, оружие, егоже трепещут демони.
     Радуйся, спасительный елей, умащающий греховныя раны кающихся;
     Pадуйся, теплое наше упование.
     Радуйся, несумненная наша надеждо;
     Pадуйся, тихое и доброе пристанище.
     Радуйся, Заступнице усердная рода христианскаго.

Кондак 11
      Пение хвалебное и благодарственное приносят Тебе, Владычице, припадающе ко иконе Твоей и любезно лобызающе ю, дев лицы, под державным покровом Твоим тихое и мирное иноческое житие провождающии, и возложивше на Тя все упование, радостно вопиют Богу: Аллилуиа.

Икос11
      Яко светоприемную свещу, зрим Твою честную икону, Пресвятая Владычице: та бо невещественный огнь благодати Твоея восприемши, и в подобиях ея новы возжигает светильники, при частны тояжде силы благодатныя, и озаряет чудесы, наставляющи на путь спасения всех вопиющих Ти сице:
     Радуйся, Невесто неневестная;
     Pадуйся, Богоизбранная Отроковице, Мати Дево.
     Радуйся, добрая Наставнице непорочнаго девства;
     Pадуйся, Хранительнице ревнующих о чистоте.
     Радуйся, жен похвало;
     Pадуйся, дев величание.
     Радуйся, вдов заступление;
     Pадуйся, сирот призрение.
     Радуйся, нищих Питательнице;
     Pадуйся, нагих одеяние.
     Радуйся, печальных утешение;
     Pадуйся, скорбящих веселие.
     Радуйся, Заступнице усердная рода христианскаго.

Кондак 12
      Благодать дати восхотеши почитающим Тя с любовию, Богородительнице присущую Ти силу благодатную оставила еси во святых Твоих иконах, ибо Боженственная благодать, спребывающи тем (иконам), знамения и чудеса выну содевает и душевных и телесных недуг исцеление всем с верою приходящим подает Твоими Богоматерними непрестанными к Богу молитвами о вопиющих Ему: Аллилуиа.

Икос 12
      Поюще Твоя чудеса, бывшая в древняя и настоящая времена, хвалим Тя, яко Живоносный источник благодати, яко неистощимую реку чудес, яко бездну милости и щедрот, и все упование по Бозе возлагающе на Тя и в сей и в будущей жизни, прославляюще Тя, вопием:
     Радуйся, христиан непостыдное упование;
     Pадуйся, верных спасительное прибежище.
     Радуйся, ненадежных надеяние;
     Pадуйся, отчаянных спасение.
     Радуйся, бане, омывающая совесть;
     Pадуйся, росо, оживляющая души.
     Радуйся, болезней врачевство скорое и безмездное;
     Pадуйся, от всех бед быстрое избавление.
     Радуйся, Утешительнице во всякой скорби;
     Pадуйся, из глубины погибели спасающая.
     Радуйся, отрадо в день смерти;
     Pадуйся, единая надеждо и по смерти.
     Радуйся, Заступнице усердная рода христианскаго.

Кондак 13
      О Всепетая Мати, рождшая всех святых святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, души спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: Аллилуиа.
Этот кондак читается трижды, затем икос 1-й и кондак 1-й

Молитва ко Пресвятой Богородице
      О Пресвятая Госпоже Владычеце Богородице! Со страхом, верою и любовию припадающие пред честною иконою Твоею, молим Тя, не отврати лица Твоего от прибегающих к Тебе, умоли, милосердная Мати, Сына Твоего и Бога нашего, Господа Иисуса Христа, да сохранит мирну страну нашу, да утвердит Церковь свою святую, да непозыблему соблюдет ю от неверия, ереси и раскола. Не имамы бо иныя помощи, не имамы иныя надежды, разве Тебе Пречистая Дево, Ты бо еси всесильная христиан Помощница и Заступница. Избави всех с верою Тебе молящихся от падений греховных, от навета злых человек, от всяких искушений, скорбей, бед и от напрасныя смерти. Даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия Твоя, сподобимся Небесного Царствия и тамо со всеми святыми прославим Пречестное и Великолепое Имя Отца и Сына и Святаго Духа. Аминь.

Тропарь Пресвятой Богородице перед Ея иконой, именуемой «Казанская»
Тропарь, глас 4:
      Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегащим. Всех нас заступи, о Госпоже Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем, пред пречистым Твоим образом со слезами, и невозвратно надежду имущих на Тя избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Кондак, глас 8:
      Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы: ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Православный календарь

Май 2020
Пн Вт Ср Чт Пт Сб Вс
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.