Вход

Изображения в галерее

808_90.jpg
833_56.jpg
17_18.jpg

АКАФИСТ Пресвятей Богородице в честь иконы Ея «Млекопитательница» (третий)


Образ Божией Матери «Млекопитательница». 18х24 см. Современная икона.

Кондак 1
      Возбранной Воеводе Владычице нашей Богородице, Млекопитательнице Спаса нашего, похвальное пение приносим мы, недостойнии, о явлении чудотворныя иконы Твоея, Всеблагая; Ты же, яко имyщая милосердие неисчетное, соблюди и спаси от всяких бед рабы Твоя, с верою и любовию вопиющия Ти:
     Радуйся, Благодатная Богородице Дево, Млекопитательнице Спаса дyш наших.

Икос 1
      Архангел Гавриил послан бысть к Тебе, Богородице, благовестити нетленное рождение от Тебе Бога Слова, иже и рече Тебе со страхом и любовию: «Радуйся, Благодатная, Господь с Тобою!», емyже подражающе и мы, смиреннии, дерзаем вопити к Тебе таковая:
     Радуйся, человеков спасение;
     Радуйся, пророческих глагол исполнение.
     Радуйся, средостение вражды древния разрушившая;
     Радуйся, вочеловечению Единаго от Троицы непорочно послужившая.
     Радуйся, Творца Небесе и земли воплотившая;
     Радуйся, Питателя вселенныя млекопитавшая.
     Радуйся, чудесы божеcтвенными просиявшая;
     Радуйся, знамения силою Сына Твоего сотворшая.
     Радуйся, мира горняго утешение;
     Радуйся, мира дольнаго заступление.
     Радуйся, Благодатная Богородице Дево, Млекопитательнице Спаса дyш наших.

Кондак 2
      Видяще Тя на иконе Твоей святей, Богомати Владычице, Богомладенца Христа на руках Твоих держащую и от сосцу Твоею Его млекопитающую, умиляемся душами нашими и, благоговейно покланяющеся Тебе и рождшемуся от Тебе Господу, рабски Ему вопием: Аллилуиа.

Икос 2
      Разум человеческий превосходит велие таинство воплощения от Тебе, Богородице, Единаго от Троицы, Христа Жизнодавца, Егоже ни Ангели небеcнии постигнути могут; мы же, земнии и перстнии, Непостижимому дивящеся и крайнее снисхождение Владычне прославляюще, Тебе, Служительнице таинства и Млекопитательнице Жизни нашея, благоумиленно глаголем:
     Радуйся, Иоакима и Анны прозябение святое;
     Радуйся, неплодныя утробы плод богодарованный.
     Радуйся, в зачатии Твоем чудесы прославленная;
     Радуйся, в рождении Твоем благодатию Божиею осененная.
     Радуйся, в благовещении Твоем смирение святое показавшая;
     Радуйся, девство и матерство пречyдно в Себе сочетавшая.
     Радуйся, Спасителя миру нетленно рождшая;
     Радуйся, яко младенца Его млекопитавшая.
     Радуйся, велие вселенныя чyдо;
     Радуйся, непостижимая разумению тайно.
     Радуйся, Божеcтва кивоте освященный;
     Радуйся, Святая Святых большая.
     Радуйся, Благодатная Богородице Дево, Млекопитательнице Спаса дyш наших.

Кондак 3
      Сила Вышняго осени Тя, Марие Богоневестная, и Дух Святый найде на Тя с благовещением архангеловым, Емyже смиренномyдренно внемлющи, зачала еси во утробе Твоей Предвечнаго Бога и явилася еси палата преукрашенная воплотившагося Слова, Емyже, яко Творцу и Создателю нашему, бренными усты вопием: Аллилуиа.

Икос 3
      Имyщи любовь велию к людем, искупленным чеcтною Кровию Сына Твоего и Бога, Владычице Преблагая, прияла еси от Него власть строити и покрывати род христианский, емyже во утешение и цельбу икону Твою святyю милостиво даровала еси, чудес благодатию прославленную во вселенней. О сем убо благодаряще Тя, яко Благодетельницу нашу, сице Тебе зовем:
     Радуйся, Звездо пресветлая, являющая нам Солнце правды;
     Радуйся, одеянная в боголепную ризу милоcердия и щедрот.
     Радуйся, приемшая власть превыше всякия власти;
     Радуйся, получившая велие дерзновение к Сыну Твоему и Богу.
     Радуйся, выну ходатайствующая пред Ним за род христианский;
     Радуйся, присно умоляющая Его за людская согрешения.
     Радуйся, скорая наша Помощнице;
     Радуйся, милоcтивая наша Застyпнице.
     Радуйся, грешных Спорyчнице;
     Радуйся, бедствующих Избавительнице.
     Радуйся, Отрадо наша пресвятая;
     Радуйся, Надеждо наша всеблагая.
     Радуйся, Благодатная Богородице Дево, Млекопитательнице Спаса дyш наших.

Кондак 4
      Бyрею недоумения и радости одержим, первосвятитель сербский Савва благоговейно прият чудотворную икону Твою «Млекопитательницу», Богородице Дево, от рyк преподобных отцев Великия Лавры великаго во отцех Саввы Освященнаго, по егоже завету икона сия от них ныне ему даровася, и благодарно славляще сей многопетое имя Твое, зовя рождшемуся от Тебе Христу Богу: Аллилуиа.

Икос 4
      Слышавше иноцы Святыя Горы Афонския, яко чудотворная икона Твоя «Млекопитательница», Богородице Владычице, от Иерусалима к ним грядет, с радостию и благоговением текоша в сретение ея и, узревше ю, рукама святителя Саввы носимую, усердно ей покланяхуся и с веселием духовным сице Тебе вопияху:
     Радуйся, Радосте наша святая;
     Радуйся, Утешительнице наша благая.
     Радуйся, Гору Афонскую в жребий Себе избравшая;
     Радуйся, иконы Твоя чудотворныя в ней умножившая.
     Радуйся, от Иерусалима утешение нам в иконе Твоей ниспославшая;
     Радуйся, оною обитель Хилендарскую облагодетельствовавшая.
     Радуйся, странствия нашего тихое прибежище;
     Радуйся, спасения нашего небyрное пристанище.
     Радуйся, иноков Покровительнице;
     Радуйся, пустынножителей Посетительнице.
     Радуйся, отшельников Собеседнице;
     Радуйся, затворников Укрепительнице.
     Радуйся, Благодатная Богородице Дево, Млекопитательнице Спаса дyш наших.

Кондак 5
      Боготечная звезда икона Твоя святая, Богомати Пречиcтая, от Иерусалима на Афон пренесенная святителем Саввою, в типикарнице пустынней от него поставлена бысть, в нейже и доныне пребывает, и исцеления недужным источает, подвизающи верных славити Тя и пети прославльшему Тя Богу: Аллилуиа.

Икос 5
      Видяще, Владычице, зде на земли святyю икону Твою, исцелений струи точащую, познаем величие и всемогyщество Твое на небеси и к славословию милоcтей и чудес Твоих возбуждаемся, моляще усердно, да, якоже ныне Тя зрим на иконе, тако да узрим Тя по смерти в Сионе горнем, матерски на нас взирающу и милости Твоея не лишающу, и тако Тебе да поем:
     Радуйся, Сиона горняго первейшее украшение;
     Радуйся, живyщих долу благонадежное заступление.
     Радуйся, дев непорочных присное величание;
     Радуйся, матрей детородящих нетрyдное разрешение.
     Радуйся, вдов Попечительнице;
     Радуйся, сирот Окормительнице.
     Радуйся, нищих призрение;
     Радуйся, болящих исцеление.
     Радуйся, заблyждших Путеводительнице;
     Радуйся, юных к целомyдрию Наставнице.
     Радуйся, немyдрых Вразумительнице;
     Радуйся, даров благодатных независтная Подательнице.
     Радуйся, Благодатная Богородице Дево, Млекопитательнице Спаса дyш наших.

Кондак 6
      Проповедует милости и чудеса Твоя Свято-Афонская обитель святаго пророка Илии, стяжавши икону Твою чудотворную, «Млекопитательница» именyемую, Богородице Всеблагая, от неяже исцелений множество излияся и помощь Твоя благодатная подается всем требующим, верно вопиющим Сыну Твоему Христу Богу: Аллилуиа.

Икос 6
      Возсияла еси лучами предивных чудес, Богородице Дево, от иконы Твоея святыя не токмо в обители Свято-Ильинстей на Афоне, но и на Руси, в нюже пренесеся сия от благоговейнаго инока Игнатия на благyю потребу обители его святыя и множество исцелений источи недужным, о нихже благодаряще Тя, Целительницу Благyю, хвалебно Тебе зовем:
     Радуйся, от горних высот всех нас матернею любовию Твоею назирающая;
     Радуйся, юдоль земнyю многоскорбную благодеянии Твоими посещающая.
     Радуйся, старца смиреннаго и безкнижнаго к прославлению иконы Твоея святыя избравшая;
     Радуйся, чрез него многия милоcти Твоя людем проявившая.
     Радуйся, не токмо на Афоне, но и в Руси чудесы икону Твою прославльшая;
     Радуйся, немало время тамо иконе Твоей пребыти благоволившая.
     Радуйся, в сиротстве от нея обитель Твою не оставльшая;
     Радуйся, икону Твою в ню милостивно возвратившая.
     Радуйся, лицезрением чудотворнаго образа Твоего доныне нас утешающая;
     Радуйся, его святым осенением от всяких бед нас спасающая.
     Радуйся, Церкви Христовы сияющая лепото;
     Радуйся, христиан православных крепкое упование.
     Радуйся, Благодатная Богородице Дево, Млекопитательнице Спаса дyш наших.

Кондак 7
      Хотящим нам, Владычице, благоговейно лобызати чудотворный образ Твой, не возбрани нам сие грехов ради наших, Всеблагая, но сице и недостойных с любовию приими, и благослови, и вся прошения наша во благо исполни; вемы бо, Царице, милоcердие Твое неисчетное, и сего ради со упованием благим к Тебе припадаем и, славяще чудеса Твоя, поем Богу: Аллилуиа.

Икос 7
      Дивно прославила еси чудесы икону Твою, «Млекопитательница» именyемую, Богородице Дево, на нейже доброту Твою девственную созерцающе и рукама Твоима держимаго, краснейшаго паче сынов человеческих, Богомладенца Иисуса видяще, на славословие Твое подвизаемся и сице Тебе зовем:
     Радуйся, девства Цвете Неувядаемый;
     Радуйся, матерей похвало и славо.
     Радуйся, мироположнице благоухания Христова;
     Радуйся, алавастре врачевания, на всяк недyг врачевство содержай.
     Радуйся, светоносная палато святейшаго Слова;
     Радуйся, преукрашенная ложнице Царя царей.
     Радуйся, горо святая, снитием Божиим прославленная;
     Радуйся, всезлатая стамно манны божественныя.
     Радуйся, клеще таинственная;
     Радуйся, купино неопалимая.
     Радуйся, глубино неудобозримая;
     Радуйся, Невесто Неневестная.
     Радуйся, Благодатная Богородице Дево, Млекопитательнице Спаса дyш наших.

Кондак 8
      Странствие наше земное, многоскорбное и многомятежное, услаждаеши нам, Владычице, иконою Твоею святою, на нюже взирающе с верою и любовию, уверяемся, яко имамы Тя на небеси Матерь и Покровительницу Всеблагyю, присно готовую помогати нам в жизни, в смерти и по смерти; о сем убо радующеся и благодаряще Тя из глубины души, вопием Создателю нашему: Аллилуиа.

Икос 8
      Весь мир христианский славит Преблагоcловенное имя Твое, Марие Богородице, и всякому верному сладостно и утешительно есть взирати на пречиcтую Твою икону, от неяже обыкла еси являти многия милоcти и чудеса бедствующим и болящим человеком. Сего ради и мы, смиреннии, чудотворному образу Твоему благоговейно покланяемся, Владычице Всеблагая, и с любовию сице Тебе зовем:
     Радуйся, святостию Херувимы превышшая;
     Радуйся, чистотою Серафимы превосходящая.
     Радуйся, яко горняя и дольняя поют рождеству Твоему немолчныя хвалы;
     Радуйся, яко небо и землю воедино совокyпила еси.
     Радуйся, кающихся грешников с Богом примирение;
     Радуйся, райских дверей отверзение.
     Радуйся, Хлеба, сшедшаго с небес, Трапезо Пресвятая;
     Радуйся, ниво неоранная, Клас спасительный миру израстившая.
     Радуйся, лозо благоcловенная, Грозд святый плодопринесшая;
     Радуйся, чаше драгая, в нейже нас ради уготовася Плоть и Кровь Христова.
     Радуйся, источниче божеcтвенный, воду жизни нам источивый;
     Радуйся, облаче легкий, имже к нам Сын Божий прииде.
     Радуйся, Благодатная Богородице Дево, Млекопитательнице Спаса дyш наших.

Кондак 9
      Всяку похвалу превосходит слава Твоя, Преблагоcловенная и Препрославленная Мати Господа нашего, недоумеют и умове безплотнии пети Тя по достоянию, паче же нам, земным и перстным, сие неудобно есть; но, любовию Твоею побеждаеми, дерзаем приносити Тебе смиренное пение хвалы и благодарения за премногую милоcть Твою к роду человеческому, егоже возлюбила еси и емyже благотворити не престаеши, Всеблагая, и сим подвизаеши нас благодарно пети Богу: Аллилуиа.

Икос 9
      Витии суемyдрии человечестии не могут постигнути велию тайну Твоего приснодевства, Богородице: како в рождеcтве и по рождеcтве Дева пребыла еси; утаи бо сие Господь от премудрых мира и верою откры смиренным, трепещущим словес Его, от нихже православно и несумненно Приснодева быти проповедуешися. Приими убо о сем и наше исповедание вседушевное, о Мати и Дево, и укрепи нас последовати Тебе непорочным житием и сердечною чиcтотою, да возможем неосужденно пети Тебе:
     Радуйся, святых обителей покрове и снабдение;
     Радуйся, иноков и инокинь благое вразумление.
     Радуйся, ревнyющим о целомyдрии и чистоте присная Покровительнице;
     Радуйся, девственных полков святая Предводительнице.
     Радуйся, Едина непорочная и добрая в женах;
     Радуйся, нетленная и неискусобрачная Агнца и Пастыря Мати.
     Радуйся, о Тебе бо радуется Ангельский собор;
     Радуйся, о Тебе бо торжествyет человеческий род.
     Радуйся, в ложеснах Твоих Бога нетесно вместившая;
     Радуйся, Сего яко младенца млекопитавшая.
     Радуйся, обителе прекрасная Духа Святаго;
     Радуйся, таиннице Пресвятыя и Единосyщныя Троицы.
     Радуйся, Благодатная Богородице Дево, Млекопитательнице Спаса дyш наших.

Кондак 10
      Спасительное прибежище в скорбех и бедах являешися христоименитым людем, Богородице Дево, и иконою Твоею святою утешение и помощь нам подаеши яко Мати Всеблагаго Бога. Темже поем чудеса Твоя и славим неисчетную милость Твою к христианскому роду, зовyще о Тебе благих Подателю Господу: Аллилуиа.

Икос 10
      Стена еси девам, Богородице Дево, и иноческим соборам, Тобою хвалящимся и на Тя по Бозе все упование спасения возлагающим, икону же Твою святyю благоговейно чествyющим, Тебе бо даровася от Господа благодать всемирнаго заступления и верных в девстве и чистоте утверждения. Темже иноческаго жития рачителие под матерний Твой покров от бyри страстей прибегают и благоотишие душевное обретают, верно к Тебе взывающе:
     Радуйся, преподобных трудов Ходатаице блаженнаго упокоения;
     Радуйся, иноком благоподвизающимся Подательнице вечнаго радования.
     Радуйся, в тайне Богу работающих тайное награждение;
     Радуйся, юношей и дев к святому девственному житию приведение.
     Радуйся, неверных в веру чудесы Твоими обращающая;
     Радуйся, верных благодатными дары ущедряющая.
     Радуйся, всяк возраст матерняго благопопечения Твоего сподобляющая;
     Радуйся, коемуждо по его потребе вся благоподавающая.
     Радуйся, благочестивых домов и семейств благоcловение;
     Радуйся, враждyющих любвеoбильное примирение.
     Радуйся, обидимых и гонимых присно готовое заступление;
     Радуйся, обидящих всегрозное обличение.
     Радуйся, Благодатная Богородице Дево, Млекопитательнице Спаса дyш наших.

Кондак 11
      Пение хвалебное приносим Ти, Всепетая Владычице, о явлении чудотворныя Твоея иконы и светло празднуем праздник Твой всечеcтный, возвещающе милоcти Твоя и чудеса, имиже обогатися вся вселенная. Ты же, Всеблагая, Сама научи нас благоприятно славити Тя, да не явимся пред Тобою безответны и изженемся от пречистаго лица Твоего яко недостойнии, но да прославим Тя с достойными, зовyще Богу: Аллилуиа.

Икос 11
      Светлыми лучами чудес Твоих, Богородице Владычице, благодатно озаряеши мрак греховный, нас обдержащий, и на стезю спасения приводиши блуждающих в дебрех страстей. Молим убо Тя, Всеблагая: приведи нас к тихому пристанищу благочестиваго и богоугоднаго жития, да в мире глубоце принесем Ти песни таковыя:
     Радуйся, величием чудес Твоих превосходящая разум человеческий;
     Радуйся, сиянием славы Твоея удивляющая умы ангельския.
     Радуйся, низлагающая бесов и всю их темную силу;
     Радуйся, подвижников благочестия укрепляющая в брани духовней со враги невидимыми.
     Радуйся, в час кончины помогающая любовь и веру к Тебе имyщим;
     Радуйся, на мытарствах воздyшных заступающая Тя славящих.
     Радуйся, Судии Праведнаго известное умоление;
     Радуйся, стяжавшая к Нему матернее дерзновение.
     Радуйся, при Кресте Сына Твоего всех нас усыновившая;
     Радуйся, благочестно верующим в Него Мати по благодати явльшаяся.
     Радуйся, от востока и до запада непрестанно славимая;
     Радуйся, от Ангел и человек превозносимая.
     Радуйся, Благодатная Богородице Дево, Млекопитательнице Спаса дyш наших.

Кондак 12
      Благодать и милоcть испроси нам, Всеблагоcловенная Владычице, у Сына Твоего Христа Бога и, простерши к Нему богоприемныя рyце Твои, умоли Его вся ны спасти и избавити от погибели вечныя: много бо может молитва Твоя матерняя ко благосердию Владыки и ничтоже невозможно всесильному пред Ним ходатайству Твоему, о немже радующеся, поем Триединому Богу: Аллилуиа.

Икос 12
      Поюще преславная чудеса Твоя, Богородице Дево, от иконы Твоея святыя явленная и присно являемая, хвалим, славим и величаем Тя, возвеличившую род наш непорочною Твою чистотою. Ты же, Всеблагая, освяти и спаси славящия Тя и сподоби нас причастники быти славы небесныя, да радостно Тебе взываем:
     Радуйся, голубице кроткая и незлобивая;
     Радуйся, Мати чадолюбивая.
     Радуйся, Агнице, Агнца Божия во чреве Твоем упасшая;
     Радуйся, от сосцу Твоею Его млекопитавшая.
     Радуйся, пророческая светлая похвало;
     Радуйся, апостольская нетленная славо.
     Радуйся, мучеников укрепление;
     Радуйся, святителей утешение.
     Радуйся, преподобных пречеcтный венче;
     Радуйся, праведных непрестающее удивление.
     Радуйся, всех святых присное радование;
     Радуйся, христиан непостыдное прибежище.
     Радуйся, Благодатная Богородице Дево, Млекопитательнице Спаса дyш наших.

Кондак 13
      О Всепетая Мати и Млекопитательнице Святых Святейшаго Слова! Нынешнее наше приемши хвалебное пение, пред святою Твоею иконою днесь приносимое, от всякия свободи мyки всех верно Тя славящих и вопиющих Сыну Твоему, Христу Богу: Аллилуиа.
Этот кондак читается трижды, затем икос 1-й и кондак 1-й

Молитва Пресвятой Богородице пред иконою Ея «Млекопитательница»
      О, Пресвятая Владычице Богородице, Пречистая и Милостивая Млекопитательнице! С любовию и благоговением припадающе ко святому и чудотворному образу Твоему, на немже видяще всех Творца и Господа, яко Младенца пречистым млеком Твоим питаема, благохваления и поклонение приносим Ти грешнии и недостойнии раби Твои и слезно молим Тя: не остави нас без Твоея помощи и заступления! Се бо грехми и страстьми разслабленни есмы и гладом духовным, погибающе, алчем и жаждем пищи небесныя. Оскуде бо в нас вера, упование благое, любовь и благочестие. Несмысленни и младоумни есмы, зане присно умом и деянми младенствуим, и воли Божией не творим, ниже разумеем, что есть благое или злое. Ты же, о Царице Небесная, Питательница жизни нашея, покровом милости Твоея покрывающая вселенную всю, напитай нас от источника благости Твоея млеком Богопознания, да возрастаим в страсе Божии и смиренномудрии. Ты еси миро, излиянное любящим Тя рабом Твоим, росою молитв Твоих Богоматерних ороси нас, да принесем Богу плоды покаяния и житие нескверное. Укрепи нас малодушных, омраченных грехми просвети, востание страстей наших утоли, ко спасению вечному окорми, немощи естества нашего исцели и не остави до конца погибнути рабы Твоя, Ты бо еси едина Заступница наша и Упование, и вси надеющиися на Тя не постыдятся. Яко да Твоими теплыми молитвами в день Страшнаго Суда Христова избавимся будущаго осуждения и нескончаемыя муки, сподобимся же избранных радости и веселия вечнаго, во еже со всеми святыми воспевати Сына Твоего, Христа Бога нашего, Емуже подобает всякая слава и благодарение, честь и поклонение со Безначальным Его Отцем и Пресвятым и Благим и Животворящим Его Духом, ныне и присно, и во веки веков.

Молитва иная
      Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе, на руках носящую и млеком питающую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе, молим Тя, Всемилостивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенец и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы наша ко Престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, яко да и мы, и чада наша прославим Тя, милосердую Заступницу и верную Надежду рода нашего, во веки веков. Аминь.

Молитва третья
      О Пресвятая Госпоже Владычице наша Богородице, Небесная наша Царице, млеком Христа Бога нашего питавшая, и нас недостойных и многогрешных Твоею богатою милостию питаеши. Спаси и избави нас грешных рабов Твоих от напрасныя клеветы, от всякия беды и напасти и внезапныя смерти. Помилуй нас в дневных часех, во утренних и вечерних и во всякое время сохрани нас: стоящих, сидящих соблюди и на всяких путех ходящих и в ночных часех спящих покрый и заступи. Защити нас, Владычице Богородице, от всех наших враг видимых и невидимых и от всякаго злаго обстояния. На всяком месте и на всякое время буди нам, Мати Преблагая, необоримая стена и крепкое заступление, всегда, ныне и присно, и во веки веков.

Тропарь Пресвятой Богородице в честь иконы Ея «Млекопитательница»
Тропарь, глас 3:
      Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без отца бывша, плотию родила еси и Младенца млеком питала еси, темже не престай молити избавитися от бед душам нашим.

Кондак, глас 5:
      Душ наших чувствия очистивше, узрим на иконе таинство преславное, Творца вселенныя и Господа вышних сил, во объятиих держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

Величание
      Величаем Тя, Пресвятая Дево, Млекопитательнице Спаса нашего, и чтим образ Твой святый, от негоже благодать исцеления нам присно подаеши.

Православный календарь

Июнь 2020
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.