Вход

Изображения в галерее

808_78.jpg
809_43.jpg
807_07.jpg

АКАФИСТ преподобному Никону исповеднику Оптинскому


Преподобный Никон исповедник, старец Оптинский.

Кондак 1
      Избранный исповедниче Оптинский, благодати старческия наследниче, воине духовный и монахов изрядный наставниче. Похвальная приносим тебе пение. Ты же, яко имея ко Христу велие дерзновение, молися о нас, любовию тебе зовущих:
     Радуйся, исповедниче Христов, Никоне богомудре.

Икос 1
      От младенства твоего тайну Воскресения постигнувый, егда умершу ти, отче мудре, молитвами матере твоея паки к жизни возвратился еси. Сего ради таковому чуду удивившеся, велегласно тебе зовем:
     Радуйся, молитвами матере от уст адских восхищеный;
     Pадуйся, радость воскресения еще в младенстве познавый.
     Радуйся, твоим благочестием смерти жало притупивый;
     Pадуйся, твоими чудодействы о животе вечнем возвестивый.
     Радуйся, дважды избегнувый смерти горчайшия;
     Pадуйся, яко сладости райския сугубо ныне причащаешися.
     Радуйся, велегласная труба воскресения;
     Pадуйся, сладкозвучный органе безсмертия.
     Радуйся, исповедниче Христов, Никоне богомудре.

Кондак 2
      Мир оставил еси, отче богомудре, и в Скит Оптинский вселивыйся, ко Христу любовию распалаемь, яко горлица пустыннолюбивая в жертву живу принесл еси себе, словесным служением взывая: Аллилуиа.

Икос 2
      Под криле богомудраго Варсонофия притекл еси, яко млеком словесным старческим окормлением от него воспитавыйся, в мужа возраста духовнаго достигл еси, темже твое боголюбие похваляем глаголюще сице:
     Радуйся, яко орля, духовную весну иский;
     Pадуйся, от зимы мирских страстей отбегий.
     Радуйся, Солнца Праведнаго лучами согретый;
     Pадуйся, звезды мысленныя постигнути желавый.
     Радуйся, под криле мудрости старческия притекий;
     Pадуйся, тою мудростию окрилен быв, в горняя востекий.
     Радуйся, небомудренное житие в Скиту обретый;
     Pадуйся, похотений юношеских избегий.
     Радуйся, исповедниче Христов, Никоне богомудре.

Кондак 3
      Кладезь мудрости в Скиту обрет, преподобне отче, писменник был еси великаго старца. В писменех бо его сладость почерпл еси благодатных словес, жажду духовную утоляя, Богу благодарне взывая: Аллилуиа.

Икос 3
      В сотаинники своя избра тебе богомудрый старец Варсонофий, души твоея провидевый богоразумную доброту, яко имаши явитися преемник благодати старческия. Сего ради воспеваем тебе похвальная:
     Радуйся, преемниче даров сыноположения;
     Pадуйся, ко отечестей любви сыновнее явивый любление.
     Радуйся, сотаинниче премудрый богомудраго старца;
     Pадуйся, непорочный агнче Варсонофиева стада.
     Радуйся, овене, пасыйся на пажитех учений;
     Pадуйся, елене, жаждаяй воды упокоения.
     Радуйся, послушниче прилежный старческих волений;
     Pадуйся, ревновавый Ангелом правым произволением.
     Радуйся, исповедниче Христов, Никоне богомудре.

Кондак 4
      Якоже дождь на землю жаждущую, тако сниде на тя старческое окормление, темже изнесе земля сердца твоего цветы прекрасныя благочестия, и фимиам благодарения принесл еси Христу, поя молитвенно Ему: Аллилуиа.

Икос 4
      Послушанием окрылився, преподобне, плоть увядил еси и духом якоже крин во юдоли пустынной процвел еси; целомудрием и чистотою украсился еси, богоблаженне. Сего ради песенный исплетеся тебе венец:
     Радуйся, добродетели целомудрия благоуханный крине;
     Pадуйся, монашеских чинов благовонный шипок.
     Радуйся, многосветлая свеще проповедания;
     Pадуйся, многоплетенный венче богомыслия.
     Радуйся, розго апостольскаго предания;
     Pадуйся, грозде Владычния любве.
     Радуйся, яко тобою девственнии лицы украшаются;
     Pадуйся, яко тобою иночестии чини утверждаются.
     Радуйся, исповедниче Христов, Никоне богомудре.

Кондак 5
      Исповеднический богосветлый венец тебе, отче Никоне, предрече богомудрый старец Варсонофий, иже узами и страдальческою смертию яко камением честным обложен. Ты же, велелепой красоте его дивяся, Христу венчающему тя возопил еси: Аллилуиа.

Икос 5
      Печали исполнися сердце твое, отче Никоне, егда старец твой завистию диавола от обители изгнан бысть. Обаче осиротел еси токмо лицем, а не сердцем, яко союзом любве к старцу привязан быв. Сего ради сыновнюю твою любовь похваляюще, сице тебе вопием:
     Радуйся, послушания рачителю известнейший;
     Pадуйся, своея воли отсекателю прилежнейший.
     Радуйся, непоколебимый исполнителю воли старца бывый;
     Pадуйся, пламенеющую любовь ему явивый.
     Радуйся, отчесыновний союз любве показавый богоподражательне;
     Pадуйся, любвеобильный преемник явивыйся старческия благодати.
     Радуйся, яко не гонение, ниже смерть разлучи тя от любве твоего старца;
     Pадуйся, яко и по смерти с нимже в райских селех водворяешися.
     Радуйся, исповедниче Христов, Никоне богомудре.

Кондак 6
      Якоже в сладости райстей в вертограде Оптинстем пожил еси, отче Никоне, плоды наслаждаяся старческаго окормления. Темже благоискусно к подвигом исповедническим уготовивый себе, поя избавителю всех Богу: Аллилуиа.

Икос 6
      Яко кедр ливанский возрасл еси во обители Оптинстей, егоже не поколеба буря безбожия, молитвою бо досязал еси небесе, и смиренномудрие, яко корень, воглубил еси в души. Сего ради в сени поучений твоих покояшеся, похвальная тебе зовем:
     Радуйся, неувядаемая отрасле оптинскаго старчества;
     Pадуйся, цветоносная ваие предпасхальныя страсти.
     Радуйся, плоде сладчайший старческаго окормления;
     Pадуйся, благоуханный крине новаго исповедания.
     Радуйся, яко терноносный шипок был еси для безбожных мучителей;
     Pадуйся, яко медоточная розга был еси алчущим истины.
     Радуйся, яко тобою уничижися гордость безбожия;
     Pадуйся, яко тобою возвысися вера православная.
     Радуйся, исповедниче Христов, Никоне богомудре.

Кондак 7
      Жертву безкровную в Казанстей церкви совершив последнюю, отче Никоне, егда от безбожников затворени быша храми вси, и сам себе уготовал еси быти жертва одушевленная, Христу пожершемуся нас ради вопия: Аллилуиа.

Икос 7
      В темницу мрачную ввергоша тя мучителие, яко надеяшася поколебати крепость твоея души, ты же яко адамант пребыл еси непоколебимь, поя благодарно псалмы, темже узилище темничное яко рая пространство вменися тебе. Сего ради великодушию души твоей дивящеся, похвальная тебе зовем:
     Радуйся, узы темничныя в бисеры себе вменивый;
     Pадуйся, похвалу Павлову себе усвоивый.
     Радуйся, апостольских преданий верный блюстителю;
     Pадуйся, благовестниче Христов всерачительный.
     Радуйся, по вся дни по глаголу Павла умиравый;
     Pадуйся, Бога Жива в себе стяжавый.
     Радуйся, яко добр воин Христов злопострадав верно;
     Pадуйся, яко подвигом исповедническим подвизався законно.
     Радуйся, исповедниче Христов, Никоне богомудре.

Кондак 8
      Из темницы изшел еси яко от брачнаго чертога, виссон праведности носяй, венцем верности от Христа увязлся еси, Никоне добропобедне, и страданьми исповедания украсился еси, поя Богу: Аллилуиа.

Икос 8
      Гонение тебе приключися, яко дух бурен, скорбными бо обстояньми от обители изгнан быв, в лодии телесней легце преминул еси бурю безбожия и блаженныя пристани Христа ради гонимых достигл еси. Сего ради яко тихия волны приступают к тебе хвалы сия:
     Радуйся, лодии церковныя изрядный управителю;
     Pадуйся, богодохновенное ветрило тихих молитв.
     Радуйся, от потопления греховнаго спасый овцы Христовы;
     Pадуйся, от раскола церковнаго избавивый паству твою.
     Радуйся, яко псалмопением обезгласил еси трубы безбожия;
     Pадуйся, яко в пристанище безстрастия достигл еси.
     Радуйся, яко немокренно шествие твое бысть в мори житейстем;
     Pадуйся, яко слезы страждущих в плач по Бозе претворил еси.
     Радуйся, исповедниче Христов, Никоне богомудре.

Кондак 9
      Слово Божие по глаголу апостольскому во устех не вяжется, обаче во вся концы вселенныя богогласно сообщается. Сице слово на тебе сбыстся, отче Никоне, яко по широте земли Русския промчася богокрасное исповедание твое, в немже пел еси Христа, зовый: Аллилуиа.

Икос 9
      Страны северныя достигл еси, отче богоносе, и подвиг странничества усугубил еси на Архангельстей земли, житие показав равноангельное, многострадальне отче. Сего ради слышиши сия похвалы:
     Радуйся, яко многи скорби претерпел еси несмущенным духом;
     Pадуйся, яко поношение приял еси ради Господа Иисуса.
     Радуйся, на земли скитаяся, небо обретый отверсто;
     Pадуйся, землю освятивый, в гроб зашед безвестно.
     Радуйся, яко равноангельную восприял еси славу;
     Pадуйся, яко посрамил еси безбожия державу.
     Радуйся, страннолепно на земли житие скончавый;
     Pадуйся, на небеси новое житие начавый.
     Радуйся, исповедниче Христов, Никоне богомудре.

Кондак 10
      Яко Божественною утварью, исповеданием твоим Церковь Русская украсися, и чин иноческий светоносным просветися благочестием твоим. Сего ради яко свещник тя зрим, отче Никоне, богоразумием на тверди церковней сияяй, и от души прославльшему тя Христу поем: Аллилуиа.

Икос 10
      Пастырскою свирелию исповедания твоего заградил еси уста безбожия и овцы разсеянныя стада Христова на пажити благочестия воспитал еси. Темже в кров твоего пастырскаго прибегающе заступления, от души умильно тебе вопием:
     Радуйся, раскола церковнаго верный устранителю;
     Pадуйся, единства духовнаго богомудрый подателю.
     Радуйся, яко пастырь сый добрый, за овцы словесныя душу положивый;
     Pадуйся, яко агнец сый непорочный, мечем девства сласть любодейства заклавый.
     Радуйся, яко старческим окормлением люди озлобленныя утешил еси;
     Pадуйся, яко богомудрыми советы свет во тьме духовней возвестил еси.
     Радуйся, башне крепкая православных догматов;
     Pадуйся, трубо благозвучная благочестивых нравов.
     Радуйся, исповедниче Христов, Никоне богомудре.

Кондак 11
      Благоухание Христово бысть житие твое, отче Никоне, в стране Российстей, испущающее ароматы богомудрых речений твоих, и воня в смерть твое исповедание познася, имже прозябения безбожнаго неверия увядил еси. Сего ради неумолкаемую песнь стяжал еси к Богу, поя Ему: Аллилуиа.

Икос 11
      Сердце яко скрижаль богописану стяжал еси, отче Никоне, ум якоже небо ясное, резцем послушания красоту монашества изобразив и Славу Божию твоим исповеданием возвестив. Сего ради Оптиной пустыни явился еси похвала и утверждение, в нейже услыши приносимыя тебе песнопения:
     Радуйся, исповедников Российских звездо светозарная;
     Pадуйся, монашествующих кроткий утешителю.
     Радуйся, сыне старческих благословений;
     Pадуйся, наставниче богомудрых речений.
     Радуйся, некрадомое сокровище оптинских преданий;
     Pадуйся, скрижале, писанная богомудрыми отцами.
     Радуйся, яко отраду подаеши во узилищех сущим;
     Pадуйся, яко сшественник бываеши гонимым ради Господа Иисуса.
     Радуйся, исповедниче Христов, Никоне богомудре.

Кондак 12
      Постное течение совершив, житие монашеское украсил еси исповеданием, добропобедне Никоне, и лествицею добродетелей небесный обретый восход, скончал еси страдальчески шествие твое, Богу со многим дерзновением представ, песнь преславную поя: Аллилуиа.

Икос 12
      Яко кимвал доброгласный житие твое явися, добродетельми красно бряцающее, и яко труба богогласная исповедание твое, добропобедне Никоне, познася. Мы же, яко дел отнюд не имуще, медь звенящая токмо являемся, и яко воздух биюще обретаемся, обаче на помощь твою надеющеся, любовию тебе зовем:
     Радуйся, православия тимпане звоногласный;
     Pадуйся, Церкве немолчная и сладкая уста.
     Радуйся, кифаро старческих поучений;
     Pадуйся, кротости песне ко иноческим ушесам.
     Радуйся, яко сын громов, благовествовал еси Евангелие;
     Pадуйся, яко глас, вопиющий в пустыне, проповедал еси нам покаяние.
     Радуйся, яко тобою побеждаем супротивная полчища;
     Pадуйся, яко тобою сликовствуем новомученическому воинству.
     Радуйся, исповедниче Христов, Никоне богомудре.

Кондак 13
      О Никоне треблаженне, иже путь на земли добре скончав и веру соблюд, и течение твоих красных ног устремив к небесному шествию. Исправи наша стези к деланию заповедей Божественных, да мимоходим сетей диавольских, но о всем преключшемся смиренномудренно поем Богу: Аллилуиа.
Этот кондак читается трижды, затем икос 1-й и кондак 1-й

Молитва Преподобному Никону исповеднику
      О, Никоне священне, о преподобне наш отче, старчества Оптинскаго светлый венче и новомучеников Русских благовонный цвете! Ты первее постническими труды душу твою очистив, демонская ополчения посрамил еси, послушанием, яко быстротечную лествицею на верхи добродетелей достигл еси и веры благославный исповедник явился еси. В годину же гонений безбожных терпением мужески облеклся еси, и яко пастырь добрый и яко истинный сын старцев Оптинских люди страждущия принимал и утешал еси. Сего ради от богоборных многия скорби претерпел еси и во изгнание осужден был еси, но якоже тогда от паствы твоея духом не отлучился, но пастырскую свирелию молитв твоих добре упасл еси овцы твоя, сице и ныне, не отступай от чад твоих духом твоим, но присно с нами пребывай, да укрепляеми тобою, веру истинно сохраним и заветы Оптинских старцев вседетельне исполним. Паче же моли Всеблагаго Господа нашего Иисуса Христа, да утвердит в Православии Церковь нашу, Отечество и люди, да сохранит обители монашеския, верныя обетом иноческим, да дарует нам прощение грехов и покаяние истинное, да очистившеся тем, возлюбим еже есть едино на потребу: прилеплятися Христу Богу и Спасу нашему всем сердцем, всем помышлением, всею волею и всем чувством ничтоже любя от похотей мира сего и тако от сетей миродержителя тьмы века сего избавляющеся, во смирении воспоем и прославим всесвятое имя Отца и Сына и Святаго Духа ныне и присно и во веки веков. Аминь.

Молитва преподобному Никону, написанная в Пинеге
      О преподобне отче наш Никоне, исповедниче Христов. К тебе, яко скорому помощнику и теплому молитвеннику мы немощнии и недостойнии прибегаем и усердно молим: по данной тебе от Бога благодати помози нам волю Господню в смирении творити, веру православную крепко содержати и достойны быти твоего от нас молитвеннаго к Богу предстательства и в час смертный заступи нас молитвами твоими. Буди Пинежскаго края Российския страны крепкий заступник, и мы предстательством твоим сподобимся обетованнаго Царства Небеснаго; умоли, угодниче Христов, всеблагаго Бога даровати нам оставление всех содеянных нами, от юности до настоящаго дне и часа делом, словом и помышлением согрешений, и исходатайствуй нам невозбранный вход в Царствие Небесное, да прославим купно с тобою Отца и Сына и Святаго Духа во веки веков. Аминь.

Тропарь Собору преподобных отцев и старцев, в Оптиной Пустыни просиявших
Тропарь глас 6:
      Православныя веры светильницы, монашества непоколебимии столпи, земли Российския утешителие, преподобнии старцы Оптинстии, любовь Христову стяжавшии и души своя за чада полагавшии, молитеся ко Господу, да утвердит земное Отечество ваше в православии и благочестии и спасет души наша.

Кондак глас 4:
      Воистину дивен Бог во святых Своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеления дароваша, ныне же, во славе Божией пребывающе, молятся непрестанно о душах наших.

Величание
      Ублажаем тя, преподобне отче Никоне, и чтим святую память твою, наставниче монахов и собеседниче ангелов.

Акафист и образ прп. Никона позаимствованы на официальном сайте Введенского
ставропигиального мужского монастыря Оптина Пустынь http://www.optina.ru

Православный календарь

Октябрь 2018
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.