Вход

Изображения в галерее

814_20.jpg
P9110982_01.jpg
816_27.jpg

АКАФИСТ собору святых преподобных Оптинских старцев


Собор преподобных старцев Оптинских. Храмовая икона Казанского собора. Оптина пустынь.

Кондак 1
      Избранным Богом от суетнаго мира, вам, о преподобнии отцы Оптинстии, крест свой благоговейно подъемше, и Христу последовавшым верою, яко дерзновенным предстателем нашым пред Господем, ныне усердное моление приносяще, с любовию взываем:
     Радуйтеся, преподобнии отцы Оптинстии, благодати старчества светилницы.

Икос 1
      Ангельскаго иноческаго жития всем сердцем взыскавше, вся мирская пристрастия отвергосте, богомудрии, и во объятия Отча с любовию в обитель Оптинy притекше, путем тесным и прискорбным до конца дней ваших шествовасте. Сего ради воспеваем сице:
     Радуйтеся, на зов Господень радостно притекшии.
     Pадуйтеся, всем желанием Христу последовавшии.
     Радуйтеся, крест свой на рамо восприимшии.
     Pадуйтеся, паче Господа ничесоже возлюбившии.
     Радуйтеся, Христа ради всеконечно себе отвергшиися.
     Pадуйтеся, Царствия Божия блаженнии наследницы.
     Радуйтеся, преподобнии отцы Оптинстии, благодати старчества светилницы.

Кондак 2
      Видевше сети диаволъския, аки паучина в мире распростертыя, и во глубине сердец ваших восчувствовавше, яко от них человецы токмо смирением спасаются, себе самех в теплой молитве пред Господем повергосте, со умилением взывающе: Аллилуиа.

Икос 2
      Разумевше сердцем и умом, яко делы своими не оправдится пред Богом всяк живый, и присно содержаще пред очесы вашими согрешения своя, токи слезныя, единому Господу зримыя, источати не престасте, покаяние души Ему приносяще, Егоже образ показасте нам, взывающым:
     Радуйтеся, грехи своя неприкровенны прозревавшии.
     Pадуйтеся, дар умиления и слез от Господа приявшии.
     Радуйтеся, блаженство плача о гресех познавшии.
     Pадуйтеся, неусыпающую скорбь о них стяжавшии.
     Радуйтеся, на земли покаяния проповедницы.
     Pадуйтеся, на небеси ныне Господем утешаемии.
     Радуйтеся, преподобнии отцы Оптинстии, благодати старчества светилницы.

Кондак 3
      Силу искупительных страданий Христовых положисте, святии, яко нерушимую надежду спасения, себе самех хуждшими всех человек и никоеяже милости достойных помышляюще, и сего ради со многим смирением и благодарением присно вопиясте Богу: Аллилуиа.

Икос 3
      Имуще в сердцах своих божественный смиренномудрия дар, истиннии ученицы Христа, смирившаго Себе даже до смерти крестныя, ни во что же вменисте вся подвиги и труды ваша. Возрастающым бо подвигом, сугубо возрасташе и смирение, емуже дивящеся, глаголем:
     Радуйтеся, послушанию и смирению Спасителем наученнии.
     Pадуйтеся, за смирение Господем Славы вознесеннии.
     Радуйтеся, безгневия и кротости смирением достигшии.
     Pадуйтеся, смирением и самоукорением покой душам обретшии.
     Радуйтеся, нищетою духовною обогатившиися избранницы.
     Pадуйтеся, ваше бо есть Царствие Небесное, нищым духом уготованное.
     Радуйтеся, преподобнии отцы Оптинстии, благодати старчества светилницы.

Кондак 4
      Бурю страстей, плотию и диаволом воздвизаемую, утоляюще, ум владыку над страстьми пагубными постнически постависте, мужески бо естество понудивше, потщастеся благодатию Божиею хуждшее покорити лучшему и плоть поработити духу, Подвигоположнику Христу пети не престающе: Аллилуиа.

Икос 4
      Слышавше глагол Господень, яко Царствие Небесное нудится и токмо нуждницы восхищают е, постом, бдением и молитвою непрестанно подвизастеся и плоть свою со страстми и похотми Христови распясте, уставы иноческия нерушимо соблюдше. Темже ублажаем вы:
     Радуйтеся, благое иго Христово люботрудно noнесшии.
     Pадуйтеся, трезвением сердечным духа не угасившии.
     Радуйтеся, крепкое хранение устом своим полагавшии.
     Pадуйтеся, телеса своя нещадно утеснявшии.
     Радуйтеся, с телесными подвиги умное делание сочетавшии.
     Pадуйтеся, в терпении вашем душы ваша стяжавшии.
     Радуйтеся, преподобнии отцы Оптинстии, благодати старчества светилницы.

Кондак 5
      Светоносное имя Иисусово, яко оружие непобедимое противу бесовския рати, непрестанно в сердцы с верою носяще, приснотекущий источник благодати обретосте, восходяще от силы в силу и огнь ко огню прилагающе, очищенным смыслом воспеваете Богу: Аллилуиа.

Икос 5
      Прозревающе всечасно немощь свою и спасительную, благодатную силу молитвы Иисусовы, николиже престасте творити ю, страстей прилоги тою посекающе и вся козни вражия попаляюще. В безмолвии сердца молитвенное собеседование с Господем таинственно обретше, нас научаете взывати вам:
     Радуйтеся, весь ум свой в молитву погрузившии.
     Pадуйтеся, всецело горе сердца своя имевшии.
     Радуйтеся, на молитве ни о чемже суетнем помышлявшии.
     Pадуйтеся, имя Иисусово неусыпно призывавшии.
     Радуйтеся, молитвы сердечныя изряднии подвижницы.
     Pадуйтеся, вся просимая во имя Господне получавшии молитвенницы.
     Радуйтеся, преподобнии отцы Оптинстии, благодати старчества светилницы.

Кондак 6
      Предстояще сердцем в молитве пред Крестом за грехи людския страждущаго Господа, рыданием возрыдасте, преподобнии, скорбию о гресех своих снедаеми и неизглаголанною любовию к Искупителю нашему возгарающеся, до конца жития убо трепетно взывасте Ему: Аллилуиа.

Икос 6
      Воссиявшу в сердцах ваших свету любве божественныя, славу земную и похвалы возненавидесте и омерзисте, безчестие же от человеков и всякия скорби отверстым сердцем радостно приемлюще, поношению Христову усердно приобщистеся. Нам убо образ злострадания и терпения показасте, зовущым:
     Радуйтеся, язвы Господа Иисуса Христа на телеси своем носившии.
     Pадуйтеся, поругания, яко врачевство чистительное, усердно пившии.
     Радуйтеся, от почестей земных всем сердцем отвратившиися.
     Pадуйтеся, за ненавидящих вас с любовию молившиися.
     Радуйтеся, обидящих вас, яко благодетелей, возлюбившии.
     Pадуйтеся, благодарити милосердаго Господа николиже преставшии.
     Радуйтеся, преподобнии отцы Оптинстии, благодати старчества светилницы.

Кондак 7
      Хотяй Господь всем человеком спастися и в разум истины приити, видя ваше благое произволение и труд непрестанный в исполнении заповедей Его, отверзе вам ум разумети пути своя и оправданием Своим научи вас. Темже сердцем просвещенным выну воспевасте: Аллилуиа.

Икос 7
      Дивна дела Твоя, Господи, яко паче книжник вразумляеши рабов Твоих, всем сердцем взыскующих Тя, и открываеши очи их, да уразумеют чудеса от закона Твоего. Блажим бо преподобных Твоих, отцев наших Оптинских, присно поучавшихся в заповедех Твоих, яже возлюбиша зело, и поем им:
     Радуйтеся, словеса Божия, яко богатство много в сердце сокрывшии.
     Pадуйтеся, путие заповедей Божиих всем сердцем возлюбившии.
     Радуйтеся, всяк путь неправды омерзившии.
     Pадуйтеся, от пути Господня николиже отступившии.
     Радуйтеся, в добрем подвизе уготовившиися и не смутившиися.
     Pадуйтеся, слово Божие вместивше, мир мног во Христе обретшии.
     Радуйтеся, преподобнии отцы Оптинстии, благодати старчества светилницы.

Кондак 8
      Странников и пришелцев на земли себе помышляюще, ничесоже от тленных вещей мира сего стяжати себе не возжеласте, да не будут сердца ваша к земли влекома, обаче к единому Богу прилепистеся, чисте возносяще Ему песнь: Аллилуиа.

Икос 8
      Всякое плотское пристрастие, от любве Господни отлучающее, вседушно отвергосте, единое на потребу взыскующе. Всегда убо при ногу Иисусову неотторженною приседесте любовию, ко благом житейским сердца не прилагающе и все упование свое на Господа возложивше. Темже похваляем вас, святии:
     Радуйтеся, без пристрастия к миру житие свое скончавшии.
     Pадуйтеся, от земных забот свобождшеся, сладость чистыя молитвы познавшии.
     Радуйтеся, твердою верою попечения житейская отложившии.
     Pадуйтеся, нестяжанием и послушанием пагубныя страсти умертвившии.
     Радуйтеся, иноческий обет нестяжания свято соблюдшии.
     Pадуйтеся, волю свою отсекшии Христовы послушницы.
     Радуйтеся, преподобнии отцы Оптинстии, благодати старчества светилницы.

Кондак 9
      Вся молитвы ваша и вся силы ваша подвигосте, преподобнии, во еже стяжати чистоту душевную и телесную, без неяже, никтоже узрит Бога: темже убо чистым сердцем сподобистеся в раи Господни достойную воспети чудную праведных песнь, зовуще: Аллилуиа.

Икос 9
      Воюющая на душу плотская вожделения постом и молитвою укрощающе, помыслом греховным возобладати вами не попускасте, от Господа Бога, единаго власть имущаго побеждати естества чин, дар чистоты и целомудрия приясте. Приимите убо и от нас хваления таковая:
     Радуйтеся, благодать Божию в борьбе с плотию смирением привлекшии.
     Pадуйтеся, труды и лишения возлюбивше, покой телесный отринувшии.
     Радуйтеся, постом и всенощными моленми похоть плоти умертвившии.
     Pадуйтеся, естества уставы силою Христовою победившии.
     Радуйтеся, телеса и душы ваша чисты Господеви принесшии.
     Pадуйтеся, чистии сердцем, Бога в вечнем блаженстве зрящии.
     Радуйтеся, преподобнии отцы Оптинстии, благодати старчества светилницы.

Кондак 10
      Спасти хотя душы своя для жизни вечныя, вся помышления о земнем и привременнем отринусте, и Спасителю нашему, заповедь велику о любви учеником Своим давшему, делом и истиною последовасте. Сего ради ближних ваших теплою любовию тогда возлюбисте, Небесному Отцу всех человеков зовуще: Аллилуиа.

Икос 10
      Возлюбивше всею душею ближняго своего, Царствие Божие внутрь себе обретосте, темже сниде в сердца ваша огнь попаляяй любве Божия, еюже необыменно насыщающеся, всецело себе в жертву делом любве принесосте. Ныне же и от нас благоговейное пение сие слышите:
     Радуйтеся, всех человеков святою любовию возлюбившии.
     Pадуйтеся, во еже некия спасти всем вся бывшии.
     Радуйтеся, о горестех людских слезно воздыхавшии.
     Pадуйтеся, всех притекающих в сердцах своих вмещавшии.
     Радуйтеся, тща от себе никогоже отпускавшии.
     Pадуйтеся, душы ваша за ближних полагавшии.
     Радуйтеся, преподобнии отцы Оптинстии, благодати старчества светилницы.

Кондак 11
      Пение молебное приносим вам, преподобнии отцы наши Оптинстии, вашею бо стезею воистинну право ходити познахом. Блаженни есте, Христу работавшии и вражию посрамившии силу, истинное правило добродетели показастеся всем, Господеви зовущым: Аллилуиа.

Икос 11
      Светлыя подвиги ваша похваляюще, преподобнии отцы наши Оптинстии, ублажаем вас, яко славных наставников монахов и чудных собеседников ангелов, ныне на Небеси Престолу Божию предстоящих и молящихся о нас, с любовию поющих вам:
     Радуйтеся, трезвения непрестаннаго усерднии ревнителе.
     Pадуйтеся, пламене сердечнаго неусыпнии хранителе.
     Радуйтеся, непоколебимии столпи послушания, вся претерпевшии.
     Pадуйтеся, многими скорбьми в Царствие Божие вшедшии.
     Радуйтеся, иноческаго жития равноангельнии подвижницы.
     Pадуйтеся, добрии раби Божии, блазии и вернии.
     Радуйтеся, преподобнии отцы Оптинстии, благодати старчества светилницы.

Кондак 12
      Благодати дар испросите нам у Господа, о блаженнии, верно хвалящым вас молим. Вонмите воздыханием нашым, слез наших не презрите. Умолите Господа утолити лютыя страсти наша, дати нам плач сокрушенный о гресех наших, да чистою душею и неоскверненными устнами купно с вами сподобимся в раи Господни воспевати: Аллилуиа.

Икос 12
      Поюще ныне вас, о преподобнии, хвалебными гласы, вемы, яко не пения устен взыскуете, но подвигом вашим последования, смирения сердечнаго и жития исправления. Темже в покаянии помощи вашея просяще, любовию же подвизаеми, глаголем:
     Радуйтеся, добре жительствующих ограждающии.
     Pадуйтеся, немощных и сирых укрепляющии.
     Радуйтеся, падающым руку помощи простирающии.
     Pадуйтеся, кающымся слезы утешительныя низпосылающии.
     Радуйтеся, всем призывающым вас скории помощницы.
     Pадуйтеся, спасения нашего пред Богом теплии ходатаи.
     Радуйтеся, преподобнии отцы Оптинстии, благодати старчества светилницы.

Кондак 13
      О преславнии угодницы Христовы, преподобнии отцы и старцы, Моисее, Антоние, Исаакие, Иларионе, Анатолие, Иосифе и вторый Исаакие, Льве, Макарие, Амвросие, Варсонофие, вторый Анатолие, Нектарие и Никоне, яко седмь столпов и седмь светилников в Оптинстей обители просиявшии! Нынешнее наше моление услышите и испросите нам у Господа смирение и память смертную, да избавит нас Господь от всякаго зла и сподобит христианския кончины всех вопиющих Ему: Аллилуиа.
Этот кондак читается трижды, затем икос 1-й и кондак 1-й

Молитва святым преподобным Оптинским старцам
      О божественный сонме преподобных отец, богоноснии старцы Оптинстии, ангельским житием на земли просиявшии и в небеснем граде прославленнии! Вемы, яко во дни земнаго служения вашего никтоже тощь и неутешен от вас отъиде, но всем вся бысте: болящым целителие, сомнящымся утверждение, печальным утешителие, яко благодать исцеления, прозрения, немощных душ врачевания обильна в вас явися. Но и ныне всем нам есте предстателие, и о страждущем Отечестве нашем приснии пред Престолом Божиим печальницы, вам бо дадеся еже за ны молитися: призрите убо от горния славы и видите стадо ваше, еже пасли есте на пажити учения Христова, яко смятено есть и повержено, и от волков душетленных расхищаемо. Посетите нас немощных и безпомощных благосердием вашим, заблуждшия взыщите, расточенныя соберите, прельщенныя обратите, и совокупите Святей, Соборней и Апостольстей Церкве: яже во иночестем житии оградите от всех навет вражиих, юность вразумите, старость поддержите, супружества в мире и единомыслии соблюдите. Услышите нас, душ божественнии врачеве, и наставите нас на путь покаяния, да последующе словесем вашым, возложим себе и весь живот наш в руце превеликаго милосердия Божия, да руководит воля Его нашими мысльми и чувствы во всех делех и словесех наших. Прострите нам руку помощи, отцы всеблаженнии, и научите нас молитися, веровати, уповати, терпети, прощати и любити: да тако в заповедех Господних присно ходяще, сподобимся ходатайством вашим вечныя радости, Царствия Небеснаго, идеже вкупе с вами прославим Бога, дивнаго во святых Своих, Отца и Сына и Святаго Духа во веки. Аминь.

Молитва иная
      О велицыи угодницы Божии, столпи и светилницы земли Российстей, преподобнии и богоноснии отцы наши Оптинстии, Моисее, Антоние, Исаакие, Иларионе, Анатолие, Иосифе и вторый Исаакие, Льве, Макарие, Амвросие, Варсонофие, вторый Анатолие, Нектарие и Никоне, по закону евангелскому Господа Бога всем сердцем и всею душею и всем разумением возлюбившии и всему народу Божию во спасение бывшии. Сего ради под покров Пресвятыя Владычицы нашея Богородицы во обитель Оптину, покаявшымся разбойником основанную, притекшии, путем тесным и прискорбным смирения и самоукорения до конца дней вашых ходившии, темже убо благодатныя дары Святаго Духа преизобильно стяжавшии: старых и младых, знатных и препростых, мудрых века сего и худоумных, никогоже от грядущих к вам ижденувшии, николиже тща и неутешна отпустившии, но светом истины Христовы всех просветившии и духовно воскресившии, ближних ваших, яко себе самех, возлюбившии и тех в сердце своем вместившии, по словеси апостола, пророчествующе и назидающе, увещающе и утешающе. Умолите Милосердаго Господа, во обитель райскую разбойника благоразумнаго с собою вземшаго, даровати нам, недостойным, яко работником единонадесятаго часа, дух сокрушения, сердца очищение, уст хранение, правоту деяний, мудрование смиреннее, слезы покаяния, веру непостыдну, любовь нелицемерну, мир душевный и здравие телесное, да предстательством вашим сподобит нас Господь добраго ответа на Страшнем Судищи Своем, вечных мук избавляя, и Царствия Небеснаго купно с вами да удостоит во веки веков. Аминь.

Тропарь Собору преподобных отцев и старцев, в Оптиной Пустыни просиявших
Тропарь глас 6:
      Православныя веры светильницы, монашества непоколебимии столпи, земли Российския утешителие, преподобнии старцы Оптинстии, любовь Христову стяжавшии и души своя за чада полагавшии, молитеся ко Господу, да утвердит земное отечество ваше в православии и благочестии и спасет души наша.

Кондак глас 4:
      Воистину дивен Бог во святых Своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеления дароваша, ныне же, во славе Божией пребывающе, молятся непрестанно о душах наших.

Величание
      Ублажаем вас, преподобнии отцы и старцы в Оптиной Пустыни просиявшии, и чтим святую память вашу, наставницы монахов и собеседницы ангелов.

Составлен И. Беляевым, родным братом прписп. Никона (Беляева)

Православный календарь

Июнь 2020
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.